ଦୀପାବଳି ପରେ ବଢ଼ିଲା ମୁମ୍ବାଇ ଓ ଦିଲ୍ଲୀର ପ୍ରଦୂଷଣ

ନୂଆଦିଲ୍ଲୀ: ଦୀପାବଳି ଉତ୍ସବ ପରେ ବାଣ ଧୂଆଁ ଯୋଗୁଁ ଦେଶର ଦୁଇ ବଡ଼ ମହାନଗର ମୁମ୍ବାଇ ଓ ଦିଲ୍ଲୀରେ ବାୟୁ ପ୍ରଦୂଷଣ ସ୍ଥିତି ଗମ୍ଭୀର ହୋଇପଡ଼ିଛି। ମୁମ୍ବାଇର ଅନ୍ଧେରୀ, ମାନଖୁର୍ଦ୍ ଓ ଦେବନାର ଭଳି ଅଞ୍ଚଳରେ ରାତି ସମୟରେ ବାୟୁ ଗୁଣବତ୍ତା ସୂଚକାଙ୍କ (AQI) ୪୮୦ ଅତିକ୍ରମ କରିଥିବା ବେଳେ ଚେମ୍ବୁର, କୁର୍ଲା, ଖେରୱାଡ଼ି ଓ ବାନ୍ଦ୍ରାରେ AQI ୨୨୦ ଉପରେ ରହିଛି। ପ୍ରଦୂଷଣ ବୃଦ୍ଧି ଯୋଗୁଁ ସକାଳେ ପ୍ରାତଃଭ୍ରମଣ (ମର୍ଣ୍ଣିଂ ୱାକ୍) ପାଇଁ ଲୋକଙ୍କ ସଂଖ୍ୟା କମିଛି। ସେହିପରି ଦେଶର ରାଜଧାନୀ ଦିଲ୍ଲୀରେ ମଧ୍ୟ ବାୟୁମାନ ଅତ୍ୟନ୍ତ ଖରାପ ସ୍ତରକୁ ଖସିଛି। ଅନେକ ସ୍ଥାନରେ AQI ୪୦୦ ଅତିକ୍ରମ କରିଥିବା ବେଳେ ସହରର ହାରାହାରି AQI ୩୬୬ ରେକର୍ଡ ହୋଇଛି। ଘନ ଧୂଆଁ ଓ କୁହୁଡ଼ିର ଆସ୍ତରଣ ଯୋଗୁଁ ଦୃଶ୍ୟମାନତା ପ୍ରଭାବିତ ହୋଇଥିବା ବେଳେ ପ୍ରଦୂଷଣ ନିୟନ୍ତ୍ରଣ ପାଇଁ ରାସ୍ତାରେ ଆଣ୍ଟି-ସ୍ମଗ୍ ଗନ୍ ମାଧ୍ୟମରେ ପାଣି ସିଞ୍ଚନ କରାଯାଉଛି।